Александар Јончевски поднесе оставка на позицијата тренер на МЗТ Скопје. Ваквата негова одлука е донесена по поразот од Крка во АБА лигата што раководството на клубот веднаш ја прифати. За привремен тренер е поставен Горан Крстевски, досегашен асистент во стручниот штаб, и клупската легенда Александар Књазев кој ќе има и консултанстка функција.
Двајцата ќе го водат македонскиот шампион во задутрешниот дуел против Лиеткабелис на домашен терен во рамки на петтото коло во Еврокупот и против ФМП во петок, исто така, во Скопје во регионалното кошаркарско натпреварување. Паралелно со тоа, управата на „металците“ најави дека ќе бара тренер на долг рок за извлекување на клубот од кризата во која е западнат.
Јончевски беше назначен за прв тренер на МЗТ Скопје по заминувањето на Емил Рајковиќ. Под негово водство „сино-белите“ од „Јане Сандански“ забележаа две победи и претрпеа седум порази во АБА лигата и во Еврокупот. Пред поднесената оставка на тренерот, челниците на клубот ги казнија кошаркарите и стручниот штаб со една плата што е образложена со лоши резултати како и незалагање и индолентност за време на тренинзите и натпреварите.