Фудбалскиот трансфер на Малколм од Бордо на прва беше мирен и не привлече особено внимание. За него беше заинтересирана Рома, двата клуба постигнаа договор за купопродажба, Бразилецот со една нога беше во Рим, откако ги усогласи и личните услови со „волчицата“ чиј спортски директор Мончи беше во постојан контакт со менаџерот на напаѓачот. Римјаните се подготвуваа за дочек на новиот член на „џалоросите“ кога одеднаш се случи неочекуван пресврт. По неговиот потпис во последен момент се вклучи Барселона, понуди пет милиони евра повеќе од 36-те на италијанскиот клуб и го привлече во своите редови.
Во Рома никако не можат да се помират со расплетот на ситуацијата. Особено бесен е претседателот Џејмс Палота кој „испали“ обвинувања на адреса на Каталонците за кои рече дека „се однеле неморално“.
„Барселона се однесе неморално. На денот во кој Малколм требаше да потпише за нас, директорот Мончи беше на линија со менаџерот, и се беше договорено за реализација на трансферот. И луѓето од Бордо може да го потврдат тоа. Се јавија од Барселона да се извинат, но јас не прифаќам извинување. Единствен начин да биде примено е да ни го пратат Лионел Меси“, порача Палота.
Малколм е дете на Коринтијанс чиј член беше од 2008 година. Една сезона (2014/15) мина и во сениорската екипа на бразилскиот лигаш и во 51 настап постигна седум гола. Изминатите две беше во дресот на тимот на Бордо за кој погоди 20 пати во 84 меча, а од претстојната ќе тресе противнички мрежи за Барселона.