Прославениот македонски и југословенски фудбалер Дарко Панчев со свој коментар за српските медиуми по победата на Србија над Португалија во квалификациите за СП 2022, но и за пласманот на македонската репрезентација во мундијалскиот бараж.
Вчерашниот ден беше за уживање во екс-ју фудбалот. Се почна со Хрватска која имаше тежок натпревар против Русија на „Пољуд“, но успеа да слави и обезбеди место на Светското првенство во Катар. Потоа се надоврза Македонија која го постигна најголемиот успех што се однесува до квалификациите и пласманите во бараж, а шлаг на тортата беше Србија, истакна Панчев.
Поранешниот соиграч на српскиот селектор, Драган Стојковиќ-Пикси во утринската програма на Курир ТВ изјави дека успехот на Србија не е случаен за сите оние кои ги следат популарните „орли“.
Да се победи Португалија, една од најдобрите репрезентации во последните десетина година, и тоа на нејзин терен е секако голем успех. Тоа е за поздравување, рече македонската „кобра“.
Анализирајќи ја играта на српскјиот тим, Панчев нагласи дека Кристијано Роналдо не се видел на терен и дека одбраната завршила добра работа, со исклучок на втората минута и малиот кикс што беше направен.
Според мене, судијата не направи ништо намерно. По тој момент, одлично го судеше натпреварот. Беше коректен, не подлегна на атмосферата и сметам дека Србија одигра фантастичен меч. Конечно да ја видиме во вистинско светло, бидејќи навистна заслужува да се најде таму каде што ќе оди, смета Панчев.
Тој констатира дека српската репрезентација не е налик онаа од минатите години во кои, како што вели, „се мачеше и играше без живот“. За сето тоа, смета Панчев, дека придонело и доаѓањето на Пикси и стручниот штаб во тимот.
Ова е некоја нова Србија, со фантастична атмосфера. Се гледа дека играчите гинат еден за друг. Сето тоа се враќа, и оној гол на Митровиќ во последната минута. Митар растура, не престанува да дава голови и нека продолжи така, порача Панчев за српски Курир ТВ.
Панчев притоа не заборави да истакне пофалби на сметка на Стојковиќ.
„Пикси беше еден од најголемите фудбалери во Европа. Неговото знаење и енергија се пренесува и на играчите и тоа се гледа. Досега се нервиравме, гледавме фудбалери без шанси, желба и енергија, сега тоа е друга приказна. Да се победи Португалија на нејзин терен не е мала работа и, секако, претставува голем подвиг. Србија покажа дека има квалитет, големи играчи, заклучи Панчев и додаде дека не стигнал да се слушне со Пикси, па приликата на Курир ТВ ја искористи за јавно да му честита за големиот успех со репрезентацијата и да му посака среќа на СП 2022 во Катар.