Најдобриот начин за да постигнеме решение во македонското прашање е да ја завршиме Времената спогодба од 1995 со меѓународен договор со надуставна сила, смета Димитрис Пападимули, потпретседател на Европскиот парламент и шеф на еврогрупата на Сириза.
Тој, во изјава за радиото 247, како пример го посочува Лозанскиот договор.
„Најдобриот начин е со меѓународен договор со надуставна сила, со комплетни и обезбедени меѓународни гаранции како што е Лозанскиот договор (што не може никој да го смени) и ќе треба да се обезбедат две големи национални барања. Прво, сложено име, заемно прифатливо, ерга омнес, за сите употреби, и второ, конечно напуштање на секаков вид на иредентизам. А иредентизмот да се замени со спогодба за пријателство и соработка меѓу двете земји, втемелена во стабилноста и неоспорувањето на постоечките граници, спогодба што ќе биде „заклучена“ во Меѓународен договор што ќе има гаранции и потпис од Европската унија, ОН итн.“, вели Пападимули.
Тој вели дека не е правник, но, според негово мислење кога има меѓународен договор со гаранции, тогаш тој е со надуставни карактеристики и е обврзувачки.
За неговиот став за меѓународен договор со надуставна сила, грчките медиуми коментираат дека изјавата на потпретседателот на Европскиот парламент и шеф на еврогрупата на Сириза доаѓа еден ден по изјавите на македонскиот премиер Зоран Заев „кој преферира меѓународен договор наместо промена на Уставот“.
Во врска со разговорите за името, Пападимули смета дека треба да има повеќе преговори на маса, а помалку интервјуа.
„Мислам дека треба да се интензивираат консултациите, преговорите, на ниво на министри за надворешни работи, а ако биде потребно и на ниво на премиери, како што добро започна со средбата Ципрас – Заев и да имаме помалку интервјуа. Преговорите преку интервјуа се помалку ефективни, отколку добро подготвени билатерални преговори на масата за дијалог“, вели европратеникот.