Парите од набавката за која Обвинителството го гони поранешниот генерален секретар во Владата, Мухамед Зеќири, биле префрлени на сметките на фирмата во Хрватска, вели основната јавна обвинителка Вилма Русковска.
На прашањето дали е можно некој да му наложил на Зеќири да ја спроведе набавката без да распише тендер, обвинителката вели дека треба да се обезбедат докази за евентуално да се гони тоа лице.
Според обвинителството, со спорната набавка е направена штета на буџетот од речиси милион евра. Генералниот секретар располага со целиот буџет на Владата, а оттаму донеле постапка за консултанска услуга, но во четири очи.
Русковска вели дека е чудно како Зеќири не се консултирал со никого, со оглед на тоа дека за секоја набавка од над 400.000 евра треба да има и меѓународен тендер, но во случајот не е побарана ниту согласност од Бирото за јавни набавки.
На поранешниот владин функционер му беше одреден притвор поради незаконски склучен договор за изработка на физибилити студија за трансформација на Пошта на Северна Македонија. Зеќири заедно со двајца хрватски државјани се товари за проневера на 145.000 евра.