Играта во одбраната во второто полувреме беше пресудна за петта радост на Вардар во ракометната Лига на шампиони. „Црвено-црните“ попладнево во СЦ „Јане Сандански“ го совладаа Мешков Брест со 30:23 (полувреме 14:14) во шестото коло и барем на 24 часа го презедоа врвот на табелата во групата А.
„Типичен пример на натпревар кој отсликува колку е тешко да се игра во Лигата на шампиони. Мешков покажа дека заслужува респект со цврстата одбрана и одличниот напад. Среќни сме што на крајот, сепак, успеавме да победиме. Клучна беше нашата игра во одбрана што беше подобра во второто полувреме“, рече вардаровиот тренер, Роберто Гарсија Парондо по мечот со ривалот кој минатиот викенд триумфира над „црвено-црните“ со 35:20 во СЕХА лигата.
Вардарци се мачеа да фатат ритам во првото полувреме и во добар дел до паузата за одмор бркаа негатива. Се соочуваа со проблеми за неутрализирање на противничките напади, се соочуваа со проблеми и за пробивање на белоруската одбрана, но и за матирање на Хрватот Иван Пешиќ чии интервенции беа ветар во грб на гостите од Брест.
Карачиќ „експлодира“ и заврши со, рекордни за него, 11 гола
Вториот дел донесе еднонасочен меч. Вардар драстично се подигна во дефанзива не скратувајќи го простор за маневар на играчите на Мешков. Цврстата одбрана беше надополнета со ефикасни реализации пришто незапирлив беше Иван Карачиќ. Хрватскиот репрезентативец го заврши мечот со, рекордни за него во ЛШ, 11 погодоци, Иван Чупиќ и Тимур Дибиров додадоа по шест, најефикасен поединец во белорускиот состав беше Александар Шкурински со пет гола.
Вардар и во наредниот викенд ќе игра на домашен терен. Гостин во Скопје во недела (17 ч.) ќе биде славната Барселона.