Министерот за надворешни работи на БиХ, Игор Црнадак не сакаше да го коментира неприсуството на претставници од Македонија и Албанија на конференцијата за евроинтеграција на Западниот Балкан која се одржа во Бања Лука ,,Имаше одредени компликации во организацијата на овој настан, но важно е дека Конференцијата беше успешна“, изјави Црнадак. Од шефовите на европските дипломатии, присуствувал само унгарскиот министер, Петер Сијарто а бил и известителот за Босна и Херцеговина Кристиан Преда.
За недобивањето покана се огласи косовскиот министер за надворешни работи, Беџет Пацоли. Тој побара реакција од европските официјални лица, за како што пренесуваат медиумите од Приштина, „ деструктивно однесување на Сараево и на Белград“. ,,Босна и Сараево треба конечно да сфатат дека не може да има регионална соработка и добрососедство без рамноправно присуство и на Република Косово во сите регионални и европски организации. Ваквите ниски дипломатски напори, реалноста да се промени со деструктивно однесување на Босна и на Србија, се во спротивност со обврските кои овие земји треба да ги исполнат на патот кон Европската Унија“,рекол Пацоли.
Српската министерка за европски интеграции, Јадранка Јоксимовиќ која присуствуваше на конференцијата во Бања Лука рече дека Србија како лидер во регионот ќе и помогне на Босна да го пополни прашалникот од Европската Комисија. Таа му честиташе на својот босански колега Црнадак на упорноста и доследноста во намерата да ја организира конференцијата и покрај потешкотиите што ги имал. Нема информација на кое ниво била претставена Црна Гора.
На еднодневната конференција своето учество го откажаа албанскиот министер за надворешни работи Дитмар Бушати и македонскиот вицепремиер за евроинтеграција Бујар Османи, бидејќи организаторот – босанското министерство за надворешни работи не покани претставници од Косово. Османи рече дека одлуката ја донел согласно интересите на државата. ,,Одлуката не ја донесов како Албанец, туку како европеец, којшто верува во европската иднина на регионот. Стратегијата на ЕУ за регионот предвидува перспектива на сите шест земји од регионот за членство во ЕУ и еден од предусловите за да може овој регион да стане дел од ЕУ е помирувањето. И каква било иницијатива со која не се дава придонес кон помирувањето, туку напротив се исклучува една од државите, е спротивна на идејата на самата Стратегија – рече Османи.