Вицепремиерот за европски прашања Бујар Османи денеска изјави дека „негова одлука“ е да не учествува на конференцијата за Западен Балкан во Бања Лука, со образложение дека на неа не е покането Косово. Оваа одлука според него е во согласност со интересите на државата.
– Одлуката не ја донесов како Албанец, туку како европеец, којшто верува во европската иднина на регионот. Стратегијата на ЕУ за регионот предвидува перспектива на сите шест земји од регионот за членство во ЕУ и еден од предусловите за да може овој регион да стане дел од ЕУ, е помирувањето. И било каква иницијатива со која не се дава придонес кон помирувањето, туку напротив се исклучува една од државите, е спротивна на идејата на самата Стратегија, изјави Османи одговарајќи на новинарско прашање.
Посочи дека и да не била повикана некоја друга држава, немало да учествува на таа конференција, бидејќи, како што рече, не е во духот на соработката и регионалното помирување.
Како што објави ТВ 24, од Владата велат дека се работи за проценка на вицепремиерот.
-Вицепремиерот Бујар Османи има донесено сопствена проценка да не учестува на конференцијата посветена на Западен Балкан. За ова прашање не е разговарано на ниво на Влада на РМ и се работи за проценка на вицепремиерот, велат од Владата на Република Македонија.
Премиерот Заев, коментирајќи ја одлуката на Османи, рече дека причината за тоа е „солидарноста што е изразена меѓу шесте земји од Западен Балкан секогаш да бидеме заедно“, додавајќи дека шесте земји од Западен Балкан секаде се заедно без разлика која колку е понапред во ЕУ интеграциите.
– Не знам зошто Косово не е покането, веројатно Босна и Херцеговина го нема признато. Ако една или две земји не се поканети, тогаш која е целта другите да присуствуваат. Не можам да потврдам колку е соодветно дадена изјавата на вицепремиерот Османи, зашто без објаснувањето кое го дадов испраќа погрешна порака до нашите партнери од регионот со кои сакаме да одиме напред. Знаеме дека сакаме да имаме добрососедски односи со сите и мораме при давањето на изјавата да внимаваме на одекот кон нашите соседи и внатре во државата, рече Заев, одговарајќи на новнарско прашање.
Оваа одлука на Османи предизвика голем број коментари на социјалните мрежи. На својот фејсбук профил реакција напиша и пратеникот од ВМРО ДПМНЕ Александар Николоски.
-По скандалот со бојкотот на Конференцијата посветена на Западен Балкан од страна на Бујар Османи се поставува сериозно прашањето кој и каква надворешна политика води? По скандалот со бојкотот на Конференцијата посветена на Западен Балкан од страна на Бујар Османи се поставува сериозно прашањето кој и каква надворешна политика води? Дека нема координација одамна е јасно, кадрите на СДСМ и ДУИ си тераат секој соло. Но, сега таа соло игра ја загрозува евроинтеграцијата на Македонија. Бујар Османи е вицепремиер за евро интеграции само на Албанците во Македонија или на сите? Дали ако Косово или Албанија не напредуваат кон ЕУ и не бидат канети на форуми каде Македонија е поканета, ние ќе престанеме да напредуваме или дали Македонија нема да прифати членство во ЕУ само затоа што таму членови нема да се Албанија и Косово? Не очекувам одговор од Османи, очекувам од Заев и СДСМ кој е спремен се да даде за власт! Толку ли му е слатка?, напиша Николоски.