Tехничката влада почна на многу лош начин да функционира. Oд првиот момент, не навлегувајќи чија е вината повеќе или помалку, не настапи како тим, оценува претседателот Стево Пендаровски vо интервју за МКД.мк. Според него има подобрување во сферата на правосудството, но тоа не е доволно. Тој го пренeсува и ставот на комесарот за проширување Вархеји дека законот за Јавно обвинителство не е поставен како формален услов на ЕУ, но „во некои европски градови поставуваат прашања од типот нели би било добро и тој закон да се донесе“.
„Ова не е формален услов, но да не им дадеме дополнителен мотив на некои да речат „и тоа требаше”. Услов беше проблемот со името и сега новата методологија. Новиот комесар ме импресионираше со познавањето на процесот што има многу технички детали, со оглед дека е кратко време на таа позиција, и со плановите за во иднина. Неговата агенда е исклучително амбициозна во оваа смисла. Речиси е убеден дека методологијата ќе биде усвоена најдоцна до март, вклучително со сите амандмани што земјите членки во меѓувреме ги даваат. И е прилично сигурен дека одлуката може да биде донесена пред Самитот во Загреб на 6 мај. Во таа смисла рече дека има добиено и повратни сигнали од некои битни европски градови, односно држави, кои досега искажуваа резерви за проширувањето во однос на овој круг, во кој сме ние и Албанија. Наводно тоа што тој го презентирал како задачи што двете држави треба да ги испорачаат во наредниве месец до два за нив ќе биде доволно за да можат да донесат позитивна политичка одлука врз основа на новата методологија пред мајскиот самит“, вели Пендаровски.
Илузија, според него, е некој да мисли дека ние можеме од Скопје да диктираме кога ќе биде донесена одлуката и каква ќе биде. „Ние чекаме одлуката да ја донесат земјите членки и се знае меѓу нив кои ги диктираат тие процеси и трендови. Комесарот за проширување има контакт со тие неколку држави и вели почетни, повратни сигнали добив, позитивни се и, се разбира, понатаму треба да се испорача. За нас станува збор за Законот за Јавно обвинителство, а во однос на Албанија за сет изборни закони за кои е потребен консензус меѓу власта и опозицијата“, нагласува Пендаровски.
Во однос на правосудството шефот на државата се согалсува дека тоа што нема пресуда за големи корупциски скандали е минус и затоа вели дека не сме на нивото на еден просечен европски систем. „Што нема сега, а имаше порано и каде јас го гледам напредокот? Нема ниту еден индикатор дека луѓе политичари диктирале судски пресуди, како што имаше случаи по телефон од лустрација на судија до политички пресуди. Нема доказ дека некој нарачува по телефон судска пресуда, нема политички затвореници како што беше случајот на Љубе Бошковски, нема новинар во затвор што е штелуван да влезе во затвор од политички причини како Кежаровски. Тоа е неоспорно подобрување, далеку сме од 2011, 2012, 2015, но во исто време многу далеку сме од она што значи европски стандард. Во овие три години нема таков скок, такво подобрување во сферата на судството какво што граѓаните бараа за време на Шарената револуција кога главниот слоган беше „Нема правда, нема мир”“, вели Пендаровски.
Што се однесува до договорите со Грција и Бугарија негова проценка е дека во однос на Договорот од Преспа шансите за промена се еднакви на нула. „Не дека не може да се промени, туку затоа што треба промена на Устав, што во принцип е тешко и нема да добиете согласност од претпоставениот албански партнер, не поради содржината на Преспанскиот договор и новото име, туку на тој начин практично ја блокирате земјата кон евроатлантските интеграции. А тоа е ултимативен интерес на секој од нас. Во однос на Договорот со Бугарија, објективно имаме една неповолна околност со Декларацијата што беше усвоена во бугарскиот парламент и веројатно веднаш по отворањето на преговорите ќе се постави како нивна позиција и во Брисел. Таа декларација, знаете, е со прилично негативна реторика и на неколку места, по мое убедување, директно го поткопува Договорот“, вели Пендаровски.
Уверен е дека предвремените парламентарни избори нема ништо да сменат во неколку магистрални насоки и внатре и надвор.