Импресивна партија имаа ракометарките на ЖРК Вардар денеска во Будимпешта во дуелот со Ференцварош. Победија со 37:24 по што сега се сами на лидерската позиција пред дуелот со Лајпциг во последното коло и вво наредната фаза во Лигата на шампионите ќе пренесат три бода од двомечот со Унгарките.

„За овој меч се подготвувавме цеа недела. Го респектиравме составот на Ференцварош кој нѝ откина бод во Скопје. Тогаш не бевме најдобри, но сега во целост ја оправдавме фаворитската улога. Го одигравме најдобриот меч досега. Фунциониравме совршено и во напад и во одбрана. И кога некоја од нас ќе погрешеше, имаше кој да помогне и затвори. Ова е мојот најдобар роденденски подарок“, истакна Пенезиќ по дуелот со Ференцварош  во кој постигна четири гола.

Вардар демонстрира ислучително висок степен на реализација во реваншот со Ференцварош. „Црвено-црните“, речиси, беа непогрешливи попладнево во Будимпешта. Нападите ги завршуваа со 56 отсто успешност и 90 отсто од прецизност на ударите.

„Среќна сум што победивме. Можеби никој не очекуваше така убедлив триумф, но сето она што беше лошо во првиот меч во Скопје, овојпат го поправивме. Се поклопија многу работи. Бевме добри и во одбрана и во напад, а на нашата добра игра дојдоа и головите“, рече Словенката Тамара Мавсар кој постигна шест гола од шест удари.