Американскиот потпретседател Мајк Пенс денеска ќе допатува во Црна Гора на самитот на Јадранската повелба со лидерите на Западен Балкан. Македонија, заедно со Црна Гора, е кодомаќин на овој самит на кој ќе учествува и премиерот Зоран Заев.

Ова е прва посета на висок официјален претставник на американската администрација на регионот од изборот на новиот претседател Доналд Трамп. Пенс ќе разговара со црногорскиот претседател Филип Вујановиќ и со премиерот Душко Марковиќ.

Пенс вети дека САД ќе ги штитат своите НАТО сојузници од напади, вклучувајќи ја тука и Црна Гора која неодамна стана полноправна земја членка на НАТО.

“Америка на прво место не значи само Америка. Нашата порака до Естонија, Грузија и Црна Гора ќе биде иста, ние сме со вас”, рече Пенс велејќи дека ова е пораката која претседателот Доналд Трамп ја испраќа до овие земји.

Вториот човек на американската администрација во Подгорица доаѓа по посетата на балтичките земји а потоа патува за Грузија.

“САД на чело со претседателот Трамп цврсто стојат зад нашиот член 5 за меѓусебна заштита. Нападот врз еден од нас е напад врз сите нас”, изјави Пенс на состанокот со претседателите на Естонија, Литванија и Летонија во Талин.