Од самата појава на корона вирусот во нашата земја, целите на Владата беа јасни. Да се помогне на што повеќе граѓани, да зачуваме што повеќе работни места, да ги поддржиме компаниите на нашите сограѓани, но и да ги поставиме темелите за рестарт на нашата економија кога ќе заврши кризата, се наведува во сооопштението на СДСМ потпишано од потпретседателот на партијата Коста Петров.
Заклучно со 7 мај, стои во дописот, од одобрените 631 апликација за „Ковид 1“ бескаматната линија од 4,7 милиони евра, се исплатени вкупно 2,2 милиони евра за 257 компании кои вработуваат 3.006 лица, односно 41 отсто од одобрените апликанти.
„Од првата група одобрени кредитни апликации што беше одобрена на 8 април, за 136 компании со 1.737 вработени, се исплатени 93 отсто од апликантите. Од втората група одобрени апликации што Владата ја одобри на седница на 14 април, за 118 компании со 1.116 вработени, се исплатени 89 отсто од компаниите. Третата група кредитни апликации што беше одобрена на 28 април, за 377 компании со 2.735 вработени, се исплатени 7 отсто од компаниите. Исплатата се прави редовно, секој работен ден, како што се завршуваат административните процедури, започнувајќи од 15 април кога се исплатија првите средства од оваа кредитна линија“, се потенцира во соопштението на владеачката партија.
За бескаматната кредитна линија „Ковид 2“ од осум милиони евра што беше отворена и за која пријавите сè уште се во тек, досега аплицирале над 2.400 компании. За финансиската поддршка од 14,500 денари по вработен, за која работодавачите можеа да аплицираат до 7 мај, за месец април се поднесени вкупно 23.861 барањa кои се однесуваат за 21.542 компании.
За оваа мерка, велат од СДСМ, аплицирале и 6.000 самостојни вршители на дејност или повеќе од 45 отсто од регистрираните, што покажува дека секоја трета компанија има аплицирано за финансиска помош до 14.500 денари за исплата на плата по вработен.
Од СДСМ нагласуваат дека Економскиот совет во моментот работи и на нов пакет мерки за директна поддршка за граѓаните и домаќинствата преку јакнење на јавната и приватната потрошувачка.
„Веќе гледаме како некои индустрии се добри примери кои видоа можности и ги искористија во оваа криза. Текстилните компании направија брза адаптација, па така извозот на маски, скафандери и друга заштитна опрема е речиси за 300 отсто поголем од април минатата година. Во април оваа година изнесува 390 милиони денари, за разлика од април лани кој беше 135 милиони денари. И во земјоделството имаме зголемен извоз на раноградинарски култури“, истакнуваат од СДСМ од каде во спрарувањето со корона-кризата ги посочуваат и проекциите од Светската Банка чии проценки, како што велат, се „дека Северна Македонија најдобро ќе се справи со економскиот удар од кризата од сите земји во регионот“.