„Со издавање на информациите однапред и соопштувањето на министерот Чулев дека станува збор за огромна акција, се информирани и структури кои не треба да бидат информирани дека во тој момент во нашата земја се одвива акцијата“, вели Славјанка Петровска, дополнителна министерка во МВР во гостувањето на „360 степени“. Запрашана дали имало камиони што превезувале банани и во земји од регионот, таа одговори потврдно бидејќи тие, како што рече, биле дел од таа голема и меѓународна координирана акција.
„Бидејќи акцијата е пробиена, не е постигнат посакуваниот ефект како што очекувале италијанските власти“, додава Петровска.
Во село Крушопек, во средата вечерта, при претрес на магазин за овошје беше пронајден еден килограм кокаин со потекло од Колумбија сокриен во кутијата со банани. За веста објавија медиумите, а набрзо потоа на социјалните мрежи се огласи и пратеникот Илија Димовски кој напиша „во три годни власт на СДСМ, не слушнавме дека е запленет ниту еден килограм кокаин. Денес МВР заплени 1,3 тони, најголема количина било кога запленета во Македонија. Слепи ли биле…? Или…?“
Еден килограм запленет кокаин, кој бил дел од многу голема количина дрога, чија крајна дестинација била нашата земја, приведени четири лица, отворање на финансиска истрага за правното лице во чии простории е пронајдена дрогата, истрага за евентуална вмешаност на други физички и правни лица, се резултатите од акција на полицијата во селото Крушопек во скопски Сарај.
Ова денеска на прес-конференција го изнесе техничкиот министер за внатрешни работи, Наќе Чулев, кој не сакаше да каже за колкава количина на дрога станува збор, со оглед на тоа што некои медиуми излегоа со написи дека пратката вкупно содржела 1,3 тони кокаин, нагласувајќи дека во моментот во интерес на истрагата не може да кажува официјално такви податоци, но напомена дека станува збор за „многу, многу голема количина“. Тој истакна дека дрогата по потекло била од Колумбија, а кокаинот е пронајден во магацин за овошје на правното лице „Банекс компани ДООЕЛ“.
„При извршениот детален претрес, во еден од пакетите било пронајдено правоаголно пакување со бела прашкаста материја, кое била залепена со зелена трака“, рече Чулев и додаде дека во операцијата се одземени мобилни телефони, околу 3.000 евра, 700 долари и 188.000 денари, „Ивеко“ товарното возило, заедно со 98 пакети банани, документација, технички уреди“, рече Чулев на прес-конференцијата.
Операцијата, рече Чулев, е меѓународна, но не сакаше да споменува конкретни држави кои се вклучени заради заштита на истрагата.