Поранешниот премиер Зоран Заев денеска во Белград, во рамки на саемот „Винска визија на Отворен Балкан“, прими признание „Голема плакета“ од Стопанската комора на Северна Македонија за особен придонес во креирањето и продолжувањето на регионалната иницијатива Отворен Балкан, чија цел е промоција и развој на регионот, преку имплементирање на четирите слободи – слобода за движење на луѓето, стоките, услугите и капиталот.
Плакетата е за личности кои најмногу придонеле за регионалната бизнис интеграција, а Комората ја доделува по повод 100 години од формирањето.
Со оваа награда на Заев му се оддава длабока почит за креирањето на регионалната иницијатива Отворен Балкан.
„Благодарам на Стопанската комора за честа што ни ја укажа на лидерите од овие три земји за иницијативата Отворен Балкан, бидејќи само заедно сплотени регионално, можеме да направиме многу повеќе за економиите на сите земји дел од процесот, да обезбедиме поголема економска соработка, повеќекратно зголемување на размената што ќе придонесе за побрз развој на регионот и благосостојба на граѓаните“, изјави Заев.
Тој порача дека како бизнисмен ќе продолжи да ги поддржува сите иницијативи во рамки на процесот Отворен Балкан бидејќи истите влијаат на развојот на бизнисите , приходите во буџетите на државите и со тоа влијаат на економската перспектива на Западен Балкан. Изрази и надеж дека и останатите земји од овие простори ќе се приклучат кон иницијативата за сите заедно да чекорат на зацртаниот пат кон Европската Унија.
„Зоран Заев во својот мандат како претседател на Владата во периодот од 2017-2021 година, покренувајќи процеси од големо значење за нашата држава совршено добро разбра дека македонската економија без регионална димензија нема шанси за успех. Со тоа ги отвори видиците на нашите компании надвор од границите на државата, а пред се во соседните земји и остави аманет до сите нас, тој пристап да продолжи и понатаму водејќи сметка и за интересите на сопствената држава. Заев продолжува да ја развива и поддржува иницијативата Отворен Балкан, сега од другата страна, од страна на бизнис секторот како двигател на економијата кој води напред, се друго останува на историјата“, беше речено на доделувањето на признанието.
Стопанската комора – „комора на иднината и консултант на компаниите во бизнисот“, одлучи наградата на Заев да му ја додели на овој прв меѓународен саем за вино, храна и туризам, како дел од активностите кои редовно се одвиваат во рамки на Отворен Балкан во насока на подигнување на регионалната соработка и бизнис интеграција, велат од Стопанската комора.
„Досега имало повеќе иницијативи за натамошен развој на овие простори, но сите завршиле неуспешно. Отворен Балкан е концепт кој е поддржан токму од внатре, од политичките лидери на земјите кои се дел од процесот, но уште повеќе од компаниите кои имаат нужна потреба за поблиска соработка, поврзување, заеднички настап на трети пазари, од што целиот регион ќе има корист. Искрените заложби како претседател на Владата во периодот 2017-2021, заедно со претседателот на Република Србија Александар Вучиќ и премиерот на Албанија Еди Рама, за развивање и креирање на иницијативата за единствен пазар преку создавање економска зона која дополнително ќе ги подобри политичките и економските односи и ќе ги зајакне врските меѓу народите и бизнисите, се препознаени и наградени од Стопанската комора и заслужуваат највисока почит, нагласија од Комората.
Ваква награда во јуни, на самитот на Отворен Балкан во Охрид, им беше доделена и на српскиот претседател Александар Вучиќ, како и на македонскиот и на албанскиот премиер Димитар Ковачевски и Еди Рама.