Шкендија е пред најзвучното гостување во клупската историја. Македонскиот вицепрвак вечерва (20,45 ч.) ќе игра на култниот „Сан Сиро“ во плеј-офот за УЕФА Европа лигата во фудбалска претстава за уживање и вечно паметење на тетовци. Против себе го имаат седумкратниот континентален првак Милан предводен од Винченцо Монтела кој, според најавите, нема да препушти ништо на случајот ако се има во предвид составот што го пријави за судирот со македонските „росонери“.
Браќата Донарума (Џануиџи и Антонио) и Сторари се опција за меѓу стативите. За дефанзивната линија ќе конкурираат Абате, Антонели, Бонучи, Конти, Габиа, Мусачо, Родригез и Запата, на располагање во средниот ред ги има Бонавентура, Чалханоглу, Кеси, Локатели и Монтоливо, а изборот за нападот е Борини, Кутроне, Андре Силва и Сусо. Ова упатува на заклучок дека италијанскиот претставник ќе настапи во најсилниот тим со исклучок на Лукас Билја и Нианг.
Противничкиот избор на играчи, сепак, не влева паника кај Шкендија. Нејзините фудбалери се решени да го извадат најдобро од себе, да одиграат најдобро што можат и да уживаат во настапот на фудбалскиот храм во Милано.
„Јасно е кому му припаѓа фаворитската улога. Имаме голем респект кон Милан, клуб кој значи многу во европскиот фудбал. Но, морам да кажам дека не дојдовме овде туристички. Зад нас се шест добри натпревари во Лига Европа летово, се надевам дека достојно ќе се претставиме и овде. Мотиви вооопшто не недостасуваат“, вели Ќатип Османи, тренерот на Шкендија.
Италијанските медиуми објавија вест дека на два дена до натпреварот со Шкендија се продадени преку 25.000 влезници, но вечерва се очекувааат преку 30.000 гледачи на трибините. Меѓу нив и неколку илјади навивачи на гостинот од Тетово кои допатуваат со околу 20 автобуси од Италија и соседните држави за поддршка на вицешампионот на Македонија.
„Гости сме на Милан што само по себе правви атмосферата во тимот да биде на највисоко ниво. Наместо притисок се чувстува позитивна енергија кај секој член во експедицијата и во екипата. Допатувавме да играме фудбал, да се прикажеме во најсветло издание пред италијанската јавност и да бидеме на посакувано ниво. Се надевам дека така и е биде“, дополни Ферхан Хасани.
Двомечот со Милан дојде како награда за Шкендија по елиминациите на Дачија (Молдавија), Хелсинки (Финска) и Тракаи (Литванија) во изминатите три кола.
Судиите на натпреварот доаѓаат од Австрија. За главен е делегиран Харалд Лехнер, негови асистенти ќе бидат Андреас Хајденрих и Максимилијан Колбич.