Кошаркарите на Будуќност ја поразија Црвена звезда со 80:72 (по четвртини: 18:25, 27:25, 21:8, 14:14) и намалија на 2:1 во финалната плејоф серија во АБА лигата. За црногорскиот состав, кој ја брани титулата, но и местото во Евролигата, ова беше прв триумф во шесте меча со „црвено-белите“ во оваа сезона. Наредниот меч меѓу двата тима е во петок од 19 часот и со евентуална победа на екипата од Подгорица ќе следува мајсторка во Белград.
Будуќност беше во позиција да се биде или не и тоа се чини ја направи разликата во преполната сала „Морача“. Клучен беше третиот период што домашните кошаркари го добија со плус од 13 коша. Притоа се истакнаа Норис Кол со 20 поени, Коти Кларк додаде 14, двоцифрен беше и Едвин Џексон (10), а Џејмс Бел запиша осум меѓу кои и важната тројка во финишот на мечот. Расположени во напад кај белграѓани беа Кеј Си Риверс со 19 коша, а Филип Човиќ и Мајк Цирбес постигнаа по 10.