Американскиот пливач Кејлеб Дресел по осми пат се најде на подиумот во Гванжу со што стана рекордер по бројот на освоени медали на Светските првенства во спортови на вода. Тој беше дел од штафетата на САД која заврши на второто место во трката 4х100 метри мешано и од Јужна Кореја заминува со шест златни одличја и две сребрени.
Првото место го освои тимот на Велика Британија (Лук Гринбенк, Адам Пити, Џејмс Гај и Скот Данкан) кој на целта имаше време од 3:28,10 минути што воедно е нов европски рекорд. Американските пливачи Рајан Марфи, Ендру Вилсон, Нејтан Едријан и Келјеб Дресел задоцнија 35 стотинки, трета беше Русија во состав Евгениј Рилов, Кирил Пригода, Андреј Минаков и Владимир Морозов.
Два рекорда во финалето на женската штафета 4х100 метри мешано
Женската штафета на САД, пак, победи во финалната штафетна трка 4х100 метри мешано во која беше соборени и два светски рекорда. Реган Смит е сопственичка на новото најдобро планетарно остварување на 100 метри грбно (57,57 секунди), а заедно со трите сонароднички (Лили Кинг, Келси Далија и Симон Мануел) пливаа и до рекорд во дисциплината (4х100 метри мешано) – 3:50,40 минути. Резултатот е за 1,15 секунди подобар од досегашниот што исто така беше во американска сопственост од Будимпешта во 2017 година.
Сребрените одличја завршија на гради на пливачките од Австралија кои имаа 3,02 секунди послабо време, бронзата ја однесоа Канаѓанките (+3,18 секунди).
Петто мундијалско злато за Унгарката Хошу на 400 метри мешано
Унгарката Катинка Хошу продолжи со доминацијата во трките на 400 метри мешани на Светските првенства. Во базенот во Гвангжу, таа ја исплива делницата со време од 4:30,39 минути и стана прва пливачка со пет шампионски титули во една дисциплина на мундијалите. Второто место ` припадна на Кинеската Је Шивен (+1,68 секунди), трета беше Јапонката Јуи Охаши (+1,94 секунди).