„Црвено-црните“ се лидери на табелата со 21 бод, четири повеќе од Шкендија која има и меч помалку. Триумф на гости и на Шкупи, бод дома понесоа Победа по дуелот со Ренова и Брегалница против Работнички Вардар и Шкендија останаа на исто бодовно растојание на врвот на табелата во првата македонска фудбалска лига по мечевите од деветтото коло.
И шампионот и вицешампионот забележаа гостински победи попладнево, а она што е карактеристично за петте меча викендот е постот на домашните екипи. Ниту една не успеа да слави пред своите гледачи. „Црвено-црните“ од Скопје славеа против Силекс во Кратово со 3:1. Спировски во 7 минута, Фелипе во 43 од пенал и Којашевиќ беа стрелци за составот на Гоце Седлоски, Ацески во 76 минута го постигна почесниот за кратовци.
Тетовци триумфираа во Битола против Пелистер со 2:1 и тоа со пресврт во финишот на натпреварот. Лукас Кардозо обезбеди предност за домашните во 32 минута, Шкендија во само две минути постигна два гола (Хасани во 83 минута и Жуниор во 84 минута) и избегна пораз „Под Тумбе кафе“. Три бода на гости освои и Шкупи. Чаирчани ја победија Македонија во Ѓорче Петров со 1:0. Единствениот гол на средбата беше дело на Траоре во 43 минута.
Победник немаше ниту во Тетово каде Ренова и Победа одиграа 1:1. Прилепчани поведоа со автоголот на Муслиу во 29 минута, во 46 минута реализира Абдула за 1:1, резултат што не се смени до крајот.
Со идентичен резултат заврши и дуелот меѓу Работнички и Брегалница вчера попладне. Водство за штипјани донесе Горан Здравков во 63 минута што го анулира Силјановски во втората минута од судиското продолжение.
ПМФЛ, 9. Коло Резултати: Силекс – Вардар 1:3, Пелистер – Шкендија 1:2, Ренова – Победа 1:1, Македонија Ѓ.П. – Шкупи 0:1, Работнички – Брегалница 1:1. Табела: Вардар 21, Шкендија 17 (-1 меч), Работнички 13, Пелистер 12, Реенова 12, Силекс 10, Шкупи 9 (-1), Победа 9, Брегалница 7, Македонија Ѓ.П. 6. Идно коло (16.10.2016 година, 14:30 часот): Шкупи – Вардар, Силекс – Шкендија, Пелистер – Победа, Ренова – Брегалница, Работнички – Македонија Ѓ.П.