По три програми за помош и осум години тешки економски реформи под надзор на меѓународните организации, Грција денеска се враќа самостојно на пазарите, но и претстои уште многу работа.
Во изминатите осум години економска криза на Грција и се позајмени 289 милијарди евра од ЕУ, Европската Централна Банка и Меѓународниот Монетарен Фонд, кои ќе ги враќа во следните неколку декади.
-За првпат од почетокот на 2010, Грција стои на свои нозе. Ова беше возможно благодарение на извонредниот напор на грчкиот народ, добрата соработа со сегашната грчка влада и поддршката на европските партнери преку заеми и намалување на долговите, изјави Марио Челентано, претседавач на Европскиот механизам за стабилност.
Иако состојбата е подобрена во Грција, преку враќање на економскиот раст и пад на невработеноста, земјата ќе остане под надзор од европските партнери за своите реформи во наредните две години.
Ова е најголемата финансиска помош во глобалната финансиска историја.
Како услов за заемите, Владата во Атина беше принудена да воведе исклучително непопуларни мерки на штедење.
За утре е најавено обраќање до јавноста на грчкиот премиер Алексис Ципрас.
Излезот на Грција од меморандумите кои освен финансиска помош донесоа и низа антикризни мерки, првично беше планиран да се одбележи со свеченост, но поради катастрофалните пожари во кои животот го загубија над 95 лица, Алексис Ципрас веројатно ќе одржи само обраќање до јавноста. Останува енигма дали обраќањето ќе биде од премиерската палата или од некоја друга локација.
Грчкиот остров Кастелоризо од каде што Јоргос Папандреу во април 2010 како премиер во обраќање до Грците соопшти дека земјата и официјално бара помош од ЕУ со што и започна меморандумската политика и брдото Пникас во близина на Акропол, се споменуваа како можни локации од кои Ципрас би и се обратил на јавноста, но по пожарите, веројатно е дека грчката влада ќе одбере друга опција.
Според грчките медиуми, не е исклучена можноста по излезот од меморандумската политика, Алексис Ципрас, во следните денови да направи реконструкција на владата.