Партијата Нова демократија на премиерот Киријакос Мицотакис освои убедлива победа на денешните парламентарни избори во Грција со 40,83 отсто гласови и 145 пратенички места, а по неа е левичарската партија СИРИЗА, предводена од Алексис Ципрас со освоени 20,07 отсто од гласовите и 72 пратенички места, објавија западните медиуми.
Во својот победнички говор, обраќајќи и се на нацијата, Мицотакис рече дека добил мандат за формирање силна автономна влада.
Резултатите од гласањето се одлучувачки. Тие покажуваат дека Нова демократија има одобрение од народот да владее, силна и автономна, истакна Мицотакис.
Тој, исто така, нагласи дека само „силните влади“ можат да ги донесат потребните промени, додавајќи дека „на Грција и треба влада која верува во реформи, а тоа не може да се случи со кревка влада“.
Мицотакис го опиша резултатот како „политички земјотрес“ и им се заблагодари на гласачите што ја поддржаа неговата партија.
Локалните медиуми пренесуваат дека Ципрас му се јавил на Мицотакис за да му ја честита победата.
Ниту еден од лидерите на останатите политички партии се уште јавно не ги коментирал резултатите од изборите.
Социјалистичката партија ПАСОК е трета, со околу 12 отсто од гласовите и 42 пратенички места. Нејзиниот лидер Никос Андрулакис откако пристигна во седиштето на партијата ги опиша денешните избори, на кои неговата партија настапи подобро од очекуваното, како „одличен ден“ за демократијата.
Со преброени околу 75 отсто од гласовите, резултатот е следен:
Нова демократија: 40,83 отсто и 145 пратенички места
СИРИЗА: 20,07 отсто и 72 пратенички места
ПАСОК-Движење на промена: 11,82 отсто и 42 пратенички места
Комунистичка партија на Грција: 7,09 отсто и 25 пратенички места
Грчко решение (Hellenic Solution): 4,50 проценти и 16 пратенички места
Останатите партии кои не влегуваат во Парламентот заедно имаат освоено 15,69 отсто.
Излезноста на парламентарните избори во Грција, според првичните официјални информации, изнесува 59,35 отсто.
Г. Т.