Казахстан одлучи да го прифати барањето и да ги избрка од земјата сите турски наставници кои се поврзани со движењето на Фетула Ѓулен, кого Турција го обвинува дека стои зад обидот за пуч. Информацијата вчера ја потврди казахстанскиот претседател Нурсултан Назарбаев, по средбата со неговиот домаќин, турскиот претседател Реџеп Таип Ердоган. Назарбаев е првиот странски лидер кој се состана со Ердоган по обидот за пуч во Турција.

Според информациите на турските власти, движењето на Ѓулен оперира во повеќе од 1000 приватни училишта низ светот. Школите биле фокусирани на наука и секуларно образование.

Турските власти досега уапсија илјадници луѓе кои ги поврзува со Ѓулен, а исто така од други земји бара да им ги испорача „ѓуленистите“.

Казакстан се одзва на овој повик.

„Во наш интерес е да не работиме против Турција.“, изјави Назарбаев и додаде дека ќе ги избрка турските наставници од училиштата на Ѓулен во Казахстан. Но, сепак не отиде чекор понапред и не најави затворање на овие школи, во кои во моментот се образуваат околу 9000 казахстански студенти.