Симболика, историја и очекувано убедлива победа на Германија донесе првиот меч на 26. Светско првенство во ракомет. „Панцирите“ во Берлин го совладаа тимот на обединетиот тим на Кореја со 30:19 (полувреме 17:10).
На трибините на „Мерцедес Бенц арена“ присуствуваше германскиот претседател, Франк Валтер Штајнмаер и неколкумина министри во германската Влада. Во свечената ложа беше и првиот човек на Интернационалниот олимписки комитет (ИОК), Томас Бах, потоа Хасан Мустафа, претседател на Светската ракометна федерација (ИХФ), на чија иницијатива Корејците испратија заедничка репрезентација на мундијалот и голем број на други високи официјални лица.
Процесот на помирување на завојуваните земји од Корејскиот полуостров и намалување на меѓусебните тензии и нетрпеливост почна на минатогодишните зимските олимписки игри во Пјонгчанг, а сега е пренесен и на ракометната игра. Корејците се единствени што допатуваа на завршниот турнир во Германија со 22 играча за разлика од 18 колку што понесоа останатите селектори. Причината е благородна. Во селекцијата се вклучени и четворица ракометари од Северна Кореја кои добија прилика да ја почувствуваат мундијалската магија.
За време на официјалниот протокол пред натпреварот, двете Кореи беа прикажани споени како една територија, беше изведена фолклорната песна „Ариранг“, неофицијална химна на Полуостровот, и истакнато сино-бело знаме какво што можевме да видиме на ЗОИ 2018.
Што се однесува до самиот меч, победникот не беше доводен во прашање во ниту еден момент. Корејците симболично поведоа со 0:1 за Германците потоа да преземат во свои раце и од минута во минута да ја зголемуваат предноста што не беше загрозена до крај на средбата.
Убедлива победа забележа и Данска, ко-домаќин на турниротт. Данците во „Ројал арена“ во Копенхаген и со пола сили го декласираа Чиле со 39:16 (полувреме: 22:4).
Македонија утре попладне (15.30 ч.) ќе игра против Јапонија во Минхен во премиерниот дуел во групата Б на СП 2019.
СП 2019 во ракомет
Група А
Кореја – Германија 19:30
Група Ц
Чиле – Данска 16:39