Русија, Италија и Естонија се ривали на македонската машка кошаркарска репрезентација во квалификациската група Б за Европското првенство во 2021 година. Со ждрепка на аеродромот во Минхен беа формирани уште седум конкуренции, а во вкупно четири се додадени и коорганизаторите на завршниот турнир – Германија, Италија, Чешка и Грузија кои имаат загарантирано учество. Па, според пропозициите, од тие групи на ЕП 2021 ќе одат по две селекции, а од останатите по три најдобропласирани.
Циклусот ќе се одвива низ три т.н. „прозорци“ по системот „секој со секого – дома и во гости“ Македонскиот национален тим во првото коло (20/21 февруари) ќе игра пред своја публика против Естонија, три дена подоцна (23/24 февруари) ќе отпатува на мегдан кај Русија. Мечевите од третото и четвртото коло се закажани за наредната есен и „црвено-жолтите“ во нив ќе гостуваат на двапати, најпрво во Италија (26/27 ноември), а потоа и во Естонија (29/30 ноември).
Македонските кошаркари ќе финишираат на домашен терен во квалификациите со дуели против Русија (18/19 февруари во 2021 година) и против Италија на 21/22 февруари во 2021 година.
Националниот тим ја почна мисијата за ЕП 2021 од претквалификациите поради драстично паднатиот рејтинг. Но, се издигна, го напушти континенталното дно и стигна до последната филтер фаза до шампионатот по две години, а селекторот Јорданчо Давитков е оптимист дека и таа ќе биде успешно пребродена.
Квалификации за ЕП 2021 во машка конкуренција
Група А: Шпанија, Израел, Полска, Словачка/Кипар/Романија
Група Б: Русија, Италија, Естонија, С. Македонија
Група Ц: Литванија, Чешка, Белгија, Албанија/Белорусија/Данска
Група Д: Хрватска, Турција, Холандија, Шведска
Група Е: Србија, Финска, Грузија/Швајцарија/Португалија/Исланд
Група Ф: Словенија, Украина, Унгарија, Австрија
Група Г: Франција, Германија, Црна Гора, Луксембург/Косово/В. Британија
Група Х: Грција, БиХ, Летонија, Бугарија
Распоред на мечевите на македонските кошаркари во квалификациите за ЕП 2021
Прво коло (20/21 февруари, 2020 година): С. Македонија – Естонија
Второ коло (23/24 февруари, 2020 година): Русија – С. Македонија
Трето коло (26/27 ноември, 2020 година): Италија – С. Македонија
Четврто коло (29/30 ноември, 2020 година): Естонија – С. Македонија
Петто коло (18/19 февруари, 2021 година): С. Македонија – Русија
Шесто коло (21/22 февруари, 2021 година): С. Македонија – Италија