Обвинение за злоупотреба на службената положба и овластување по член 353, став 2 во врска со став 1 од Кривичниот законик е поднесено против поранешниот претседател на Врховниот Суд, Јово Вангеловски кој беше сменет во септември лани, а официјално разрешен во март оваа година. Како причина тогаш беше наведено несовесно извршување на функција, т.е. укинување на притворот на бизнисменот Сеад Кочан во 2017 година по што се даде во бегство.
Од скопското Обвинителството информираат дека кон крајот на 2018 година тој донел поединечни решенија за додаток на плата за месец ноември за сите судии на Врховниот суд, освен за една судијка со што и го скратил правото на 31.189 денари, иако не користела отсуство од работа во наведениот период.
Додатокот е во износ од 35 отсто на основната плата што според Закон им следува на судиите при посебни услови за работа, доверливост и при постоење на висок ризик.
Против Вангеловски во меѓувреме има и предистрага од Обвинителството за предметите што неговиот наследник на функцијата ги пронашол во фиока за што Нова пишуваше во јануари оваа година. Сомнежите се дека намерно не се постапувало по нив, па некои застареле, а некои треба одново ќе се реферираат. Од тогаш минаа пола година, но сè уште нема епилог по тоа.