Правници, политиколози, економисти, но и занаетчии и со средно училиште. Ова се само дел од образовните насоки на светски државници. Најголем дел од нив имаат некој вид на вишо или високо универзитетско педигре, но доста се разликуваат во студиските области што биле сфера на интерес во студентските денови.
Лидери, како на пример Ален Берсе кој е претседател на Швајцарија, студирале политички науки или право меѓутоа ги има во голем број кои се одржуваат на сцената иако по вокација имаат малку заедничко со политика или ништо воопшто. Пример за вторите е првиот човек на Парагвај, Хорасио Картес кој заврши авиомеханика во САД. Претседателите на Венецуела (Никола Мадуро) и на Боливија (Ево Моралес) имаат само средно училиште.
Се чини дека европските државници предничат со дипломи од политички науки. Покрај Берсе, ги имаат и претседателите на Македонија (Ѓорѓе Иванов), на Словенија (Борут Пахор), на Хрватска (Колинда Грабар-Китаровиќ), на Унгарија (Јанош Адер), на Португалија (Марсело Ребелјо де Соуса), на Малта (Мари Луиса Колеиро Прека) како и премиерката на Норвешка (Ерна Солберг).
Биографии како дипломирани правници имаат претседателот на Србија (Александар Вучиќ), на Италија (Серџо Матерела), на Грција (Прокопис Павлопулос), на Полска (Анджеј Дуда), на Финска (Саули Нинисто), на Кипар (Никос Анастасијадес) и претседателите на Владите на Данска (Ларс Локе Расмусен), на Белгија (Шарл Михел), на Луксембург (Хавиер Бетел).
Меркел на физика, Путин правник, Макрон на филозофија, Меј на географија, Рама на сликарство
За германската канцеларка Ангела Меркел важи дека била вреден и посветен студент. Најпрво (1973 година – 1978 година) дипломира на студиите по физика на Универзитетот „Карл Маркс“ во Лајпциг, во 1986 година се стекна со титула доктор, откако ја одбрани својата теза за квантна хемија. Диплома од студии по физика има и претседателот на Романија, Клаус Јоханис.
Францускиот претседател Емануел Макрон студираше филозофија по што доби стекна диплома за јавна администрација на Институтот за политички науки во Париз.
Меѓу европските лидери има и економисти како Реџеп Таип Ердоган, кој патем играл и фудбал за Касимпаша, но и професии што немаат допирна точка со политиката. Премиерот на Р. Ирска (Лео Варадкар) се определи за медицина, неговата британска колешка Тереза Меј студираше географија, претседателот на Исланд (Гудни Торлациус Јоханесон) е дипломиран историчар, првиот човек на Бугарија (Румен Радев) беше питомец на Воена Академија, премиерот на Албанија (Еди Рама) заврши сликарство.
Рускиот претседател Владимир Путин дипломира право на државниот универзитет во Ленинград.
Интерен е примерот со образованието на Стефан Ловен, премиер на Шведска. Откако заврши обука во шведското воздухопловство, напрво стана заварувач, а потоа и синдикален лидер кој застапуваше над 300.000 работници.
Трамп дипломира економија во Пенсилванија, претседателите на Перу и на Аргентина – градежници
За разлика од Европјаните, политичките науки не биле привлечни за државниците од Северна, Средна и Јужна Америка. Донал Трамп дипломира економија на универзитетот во Пенсилванија, претседателите на Аргентина (Маурисио Макри) и на Перу (Мартин Вискара) завршија градежништво додека уругвајскиот претседател (Табаре Васкез) заврши медицински факултет.
Само еден државник во Северна Америка е со диплома од политички науки. Тоа е новоименуваниот претседател на Мексико, Андрес Мануел Лопез Обрадор кој на функцијата стапи на први декември.
Азија со најмногу воени академци
Најмногу лидери на азискиот континент, пак, се школувале во војска. Дипломци на Воена Академија се претседателите на Северна Кореја (Ким Јонг Ун), на Лаос (Бунханг Ворачит), на Либан (Мишел Аун), но и премиерите на Тајланд (Прајут Чан-о-ча), на Оман (султан Кабос бин Саид ал Саид) и на Катар (Абдула бин Насер бин Калифа ал Тани).
На политички науки дипломираа претседателите на Виетнам (Тран Даи Куанг) и на Шри Ланка (Маитрипала Сирисена) како и премиерите на Индија (Нарендра Моди) и на Јапонија (Шинзо Абе). Правници се претседателите на Јужна Кореја (Мон Јае Ин) и на Филипини (Родриго Дутерте).
Политиколози, питомци, архитект и геолог во Африка
Диплома од студии по политички науки имаат и пет претседатели на африканскиот континент. Тоа се Хаге Геингоб (Намибија), Јовери Мусевени (Уганда), Ухуру Кенјата (Кенија), Мохамед Абдулахи Мохамед (Сомалија) и Џулиус Мада Био (Сиера Леоне).
Голем е бројот на државници кои студирале на Воена Академија, а меѓу оние кои се разликуваат од нив се претседателот на Танзанија (Џон Магуфули) кој поседува докторска диплома од хемија, неговите колеги во Сенегал (Маки Сал) и во Нигер (Махамаду Исуфу) кои завршија геологија и рударство како и премиерот на Либија (Фајез ал Сарај) кој по професија е архитект.