Претставниците на органите за спроведување на законот се состанаа на Менхетен за да разговараат за обвинението против поранешниот американски претседател Доналд Трамп, кое би можело да биде поднесено вечерва или в среда, како и за неговото можно апсење поради, меѓу другото, поткупот на порно ѕвездата Сторми Даниелс за време на претседателската кампања во 2016 година, објави денеска американски „Политико“, повикувајќи се на тројца неименувани извори вклучени во случајот.
Големата порота се очекува подоцна денеска или в среда да го обвини поранешниот претседател Трамп за, меѓу другото, подмитување на порно ѕвездата Сторми Даниелс за време на претседателската кампања во 2016 година.
На средбата во седиштето на њујоршката полиција, покрај претставници на тој оддел, присутни се и претставници на американската тајна служба, судски службеници и службеници од канцеларијата на окружниот обвинител на Менхетен, Алвин Брега.
Ќе разговараме како да го приведеме Трамп, истакнал еден од изворите, наведувајќи дека се уште не е донесена одлука.
Канцеларијата на окружниот обвинител на Менхетен, Алвин Брега ја истражува тајната исплата од 130.000 долари извршена од Мајкл Коен, поранешен „фиксатор“ на Трамп, на порно ѕвездата Сторми
Даниелс за време на претседателската кампања во 2016 година.
Кога запечатеното обвинение ќе биде доставено до судијата, обвинителството ќе разговара за предавањето на Трамп со неговиот бранител, изјави неименуван судски функционер, додавајќи дека доколку Трамп не се предаде, по него ќе биде распишана потерница.
Трамп во саботата објави дека, според протечените информации, очекува да биде уапсен во вторник и ги повика неговите приврзаници на протести.
Портпарол на Трамп истакна дека поранешниот американски претседател не бил известен за никакво претстојно апсење.
Г. Т.