Италијанската полиција денеска спроведе „историска“ рација против калабриската мафијашка група „Ндрангета“ при што уапси 334 нејзини членови во земјата, но и ширум Европа. Во акцијата учествуваа околу 2.500 карабињери и припадници на специјалната единица „Рос“ кои притоа имаа поддршка и од воени падобранци.
Уапсените се осомничени за злосторничко здружување, за убиства во рамки на пресметките во мафијашките кланови, за рекет и за перење пари. Дел од нив се веќе сместени во затвори, а за дел е одредена мерката куќен притвор со специјален надзор.
Операцијата следуваше по тригодишна истрага против „Ндрангета“ во Калабрија и уште 11 области на северот и југот на Италија. Некои од осомничените се уапсени во Швајцарија, во Германија, во Бугарија по издадена европска потерница.
Меѓу уапсените има адвокати, бизнисмени, функционери на локална власт и судство и поранешен пратеник во италијанскиот парламент од партијата на екс премиерот Силвио Берлускони. За време на операцијата е запленет имот во вредност од 15 милиони евра. Се проценува дека „Ндрангета“, што на грчки значи „херојство“, поради шверцот на кокаин од Латинска Америка стана помоќна и од озлогласената сицилијанска мафија „Коза ностра“ што во превод е „Наша работа“.