Полското обвинителство нема да дозволи украински експерти да се приклучат на полско-американската истрага за ракетната експлозија во селото Пржеводов, бидејќи нема законски основи за тоа, пишува денеска полскиот весник „Жечпосполита“.
„Не постои таква законска можност и тоа би било спротивно на правилата за водење постапка, дотолку повеќе што се проверуваат сите можни верзии за инцидентот, вклучувајќи ја и онаа дека се работи за ракета на украинската противвоздушна одбрана“, велат за „Жечпосполита“ извори од Обвинителството.
Украина од почетокот бара во истрагата да бидат вклучени и нејзини експерти, особено откако претседателот Володимир Зеленски и украинските служби до викендот тврдеа дека руска ракета паднала врз Полска, а не украинска, испукана да ја пресретне руската, како што соопштија полските власти, американската администрација и НАТО.
Полското обвинителство им дозволи на украинските експерти само да го разгледаат местото на инцидентот, а полскиот претседател Анджеј Дуда предупреди дека за вклучување на Украина во истрагата и за пристап до доказниот материјал мора да постои правна основа, согласно меѓународното право преку меѓудржавна правна помош.
„Едната можност е барање за правна помош според билатерален договор, а другата е да се формира меѓународна група истражители, за која одлучува главниот обвинител во Полска“, изјави шефот на Бирото за национална безбедност на Полска, Јацек Шевјера.