Данска – Франција и Германија – Норвешка се полуфиналните двојки на 26. Светско ракометно првенство. Ова е епилогот по дуелите од последното коло во главната групна фаза на турнирот.
Германците завршија како лидери во групата Е во Келн по триумфот над Шпанија со 31:30, откако Хрватска, претходно, ` го нанесе првиот пораз на Франција 23:20 и обезбеди место во квалификациите за Олимпијадата во Токио во 2020 година.
Ако полуфиналистите од групата Е беа познати на коло пред крајот, тогаш се беше отворено во групата Ф. Норвешка беше убедлива во дуелот со Унгарија (35:26) и се проби на второто место на кое и остана на крајот благодарение на победата на Данска над Шведска со 30:26.
Полуфиналните мечеви на СП 2019 се закажани за петок во Хамбург. Од 17.30 часот ќе играат Данска и Франција, од 20.30 часот ќе биде и пресметката на Германија и Норвешка.
Големото финале и мечот за бронзениот медал ќе бидат во недела во Хернинг каде ден порано ќе се судрат Хрватска – Шведска за петто место и Шпанија – Египет за седмата позиција. Титулата на шампионатот ја брани Франција.
СП во ракомет – главна фаза
Група Е, 5 коло
Германија – Шпанија 31:30
Франција – Хрватска 20:23
Бразил – Исланд 32:29
Табела: Германија 9, Франција 7, Хрватска 6, Шпанија 4, Бразил 4, Исланд 0.
Група Ф, 5 коло
Данска – Шведска 30:26
Норвешка – Унгарија 35:26
Тунис – Египет 23:30
Табела: Данска 10, Норвешка 8, Шведска 6, Египет 3, Унгарија 3, Тунис 0.
Двојки за полуфинале
Данска – Франција (петок, 17.30 ч.)
Германија – Норвешка (петок, 20.30 ч.)
За петто место: Хрватска – Шведска (сабота, 20.30 ч.)
За седмо место: Шпанија – Египет (сабота, 17.30 ч.)