Американскиот Сенат го усвои изменетиот закон за даноци, за што Американците сметаат дека станува збор за најголемата реформа последните 30 години.
Законот помина во Претставничкиот дом, а во текот на наредната недела ќе се подготви обединета верзија која на крајот ќе ја потпише претседателот Доналд Трамп.
Американските медиуми пишуваат дека усвојувањето на законот се смета за прва голема победа на Трамп во Конгресот.
Законот помина со 51 глас ЗА и 49 ПРОТИВ.
Со усвојувањето на законот се отвора патот за остварување на целите на Републиканците – намалување на данокот за компании и за богатите Американци, а за просечните семејства се предвидени одредени олеснувања.
Демократите кои гласаа против, реагираат на тоа што со изменетиот закон, најголема корист ќе имаат богатите Американци и крупниот бизнис.
Претседателот Трамп на својот Твитер напиша дека реформата значи благосостојба за работничките семејства.
Според проценките, националниот долг на земјата ќе порасне за дополнителни 1,4 трилиони долари во наредните 10 години и ќе достигне 20 трилиони, за да се финансираат промените кои ќе стимулираат економски раст.