Поранешниот генерален секретар на Владата, Драги Рашковски попладнево, со полициска придружба, од затворот во Шутка е спроведен на локација на која ќе ја издржува мерката куќен притвор. Одлуката за замена на ефективниот притвор со домашен ја донесе Апелацискиот суд во текот на денот. За да се брани од слобода и дека нема да се впушти во бегство, Рашковски понудил гаранција од пола милион евра.
Вишото Јавно Обвинителство Скопје се согласи Драги Рашковски да излезе од притвор со гаранција, потврдија за „360 степени“ од обвинителството. Ваквиот став на второстепената обвинителска инстанца следуваше по жалбата на Рашковски за продолжување на мерката притвор против него во втората половина на мај од Кривичниот суд во Скопје.
– Ве известуваме дека Вишото јавно обвинителство Скопје, по предметот оформен по поднесена Жалба на обвинетиот Д.Р. со понудена гаранција, до Апелациониот суд Скопје согласно законските надлежности достави писмен предлог со кој му се предлага на Судот да ја уважи жалбата на обвинетиот, да ја прифати понудената гаранција во висина од 30.686.215.00 милиони денари и да ја замени мерката притвор со понудената гаранција, нагласија од ЈОРМ.