Министерот за надворешни работи, Никола Попоски во своето обраќање денеска на втората сесија на Парламентарно собрание на ОБСЕ „Развој на демократски институции и човекови права во ЈИЕ“, рече дека ОБСЕ е многу важен за изборите кои следат.
– Активностите на ОБСЕ во континуитет се имплементираат преку заеднички програми во функција на клучните државни приоритети. На овој начин ги поттикнуваме реформските процеси истовремено исполнувајќи ја европската агенда, рече Попоски истакнувајќи ја важната улога на ОДИХР во мониторингот на изборните циклуси.
Во рамките на настанот, Попоски одржа и работен појадок со Генералниот секретар на ПС на ОБСЕ Роберто Монтела и амбасадорите на Швајцарија, Украина и Латвија при ОБСЕ во Виена зборувајќи за политичките предизвици и изборните подготовки во Македонија, како и мигрантската криза.
Во таа насока, согoворниците изразиле уверување дека за претстојните предвремени парламентарни избори ќе биде организирана масовна набљудувачка мисија на ПС на ОБСЕ, ОДИХР и други релевантни меѓународни институции, за да се евалуира многу важниот изборен процес што треба да ја извади Македонија од политичка криза и да ја врати на европската агенда.