Законот за државјанство мина на денешната владина седница и ќе биде со европско знаменце. Службите ќе го испратат до Парламентот, но го блокира Левица без разумно оправдување, рече денеска премиерот Зоран Заев.
– Законот е согласно декларациите за државјанство усвоени во Европската Унија. Последните промени беа со коресподентни табели, комплетно вградување на европските регулативи во нашето законодавство. Критериумите за решавање на проблемот со државјанството се прават пошироки. Генерално сме усогласени, власта и опозицијата. Законот е блокиран од мала политичка партија Левица која без разумно оправдување не дава одговор зошто тоа го прави, освен, според мене, да продуцира меѓуетнички проблеми и нетрпеливост што треба да го чуваме и негуваме, а не да го поттикнуваме и разгоруваме, рече Заев на заедничката прес-конференцијата со министерката Јагода Шахпаска во Владата.
Според Заев, иако законот е поднесен на иницијатива на Алијанса на Албаните и Алтернатива, договорено е Владата да го пушти.
– Се работи за буквално истиот текст поднесен од пратениците. Службите овие денови ќе го испратат до Парламентот, додаде премиерот.