Поради зголемениот обем на производство, очекуваме оваа година компаниите да искористат 20 проценти повеќе гас, а економската активност за првите пет месеци и покрај кризата и ризиците расте со стабилно темпо, изјави директорот на ТИРЗ Јован Деспотовски.

Тој на денешната средба со новинарите за новиот развоен концепт на ТИРЗ, со кој Технолошко индустриската зона во Гевгелија ќе стане првата „зелена“ инвестициска зона во земјава која ќе се фокусира на поддршка на зелените индустрии и ќе функционира како Јавно приватно партнерство, појасни дека за првите пет месеци економијата во рамки на зоните покажува добри резултати и покрај ризиците од последиците од руско-украинската војна и ризиците поврзани со движењата на цените на енергетските пазари.

„Споредено со минатата година цената на гасот е веќе зголемена за четири и пол пати, и се надевам нема да расте понатаму. Компаниите имаат регистирано зголемена добивка минатата година за 20 проценти што значи дека имаат внатрешни резерви за справување со сите тие притисоци“, рече Деспотовски.

Тој рече дека доколку ситуацијата со кризата ескалира ќе се разгледааат сите можности кои стојат на располагање, но дека во моментот нема никаков сериозен индикатор односно аларм дека треба да да се презема нешто. (МИА)