Поројните дождови предизвикаа проблеми во Солун и во реонот на Мудања, на полуостровот Халкидики, изјави директорот на Службата за цивилна заштита на регионот Централна Македонија, Хараламбос Стергиадис.
Тој додаде дека дождот предизвикал прекин во снабдувањето со електрична енергија во регионот Мудања, објавија грчките медиуми.
Противпожарната служба примила повеќе од 300 итни повици низ северна Грција, вклучително и Солун и Халкидики, за испумпување на вода, отстранување на искорнати дрвја и за евакуација на луѓе на безбедно. Поплавени се и неколку патишта во регионот, поради што е блокиран сообраќајот.
Истовремено, градоначалникот на Костур, Јанис Коренџидис, побара прогласување вонредна состојба во неговиот град од страна на регионалниот гувернер на областа Западна Македонија, откако поројните дождови предизвикаа големи поплави, а исто така го погодија и земјоделското производство.
Национална метеоролошка служба предупреди дека денеска се очекува дожд и невреме со грмежи и можна појава на град во повеќето области на Грција, вклучително и на островите.
Г. Т.