Малопродажните цени на нафтените деривати се зголемуваат во просек за 8,50 отсто, соопшти денеска Регулаторната комисија за енергетика (РКЕ). Малопродажната цена на бензинот „еуросупер 95“ се зголемува за три денари за литар и ќе изнесува 57,5 денари, додека на бензинот „еурсупер 98“, на еуродизелот (Д-Е V) и на екстра лесното масло за домаќинство (ЕЛ-1) се зголемува за 2,5 денари за литар. Па, „еуросупер 98“ ќе чини 59,5 денари, еуродизелот (Д-Е V) 49,5 денари, додека екстра лесното масло за домаќинство 37,5 денари.
Според РКЕ, малопродажната цена на мазутот М-1 НС се зголемува за 3,929 денари за килограм во однос на цената утврдена со Одлуката минатата недела и ќе изнесува 23,427 денари.
„Референтните цени на нафтените деривати на светскиот пазар во споредба со изминатиот седумдневен период бележат зголемување кај бензинот во просек за околу 23,66 отсто или за 57,200 долари за тон, кај дизелот зголемување во просек за околу 16,74 отсто или за 40,900 долари/тон, кај екстра лесното масло зголемување во просек за околу 20,86 отсто или за 45,800 долари/тон и кај мазутот зголемување во просек за околу 19,69 отсто или за околу 33,900 долари/тон, поради што во структурата на цените на нафтените деривати е извршено соодветно прилагодување. Курсот на денарот во однос на доларот во изминатиот седумдневен период изнесуваше 56,5651 денари/1 долар што е за околу 0,602 отсто понизок од курсот на доларот (56,9074 денари/1 долар) по кој беа формирани цените со претходната пресметка“, објаснува Комисијата.