Управниот суд ја уважи тужбата на коалицијата предводена од ВМРО-ДПМНЕ и со тоа е донесена конечна одлука дека нема да има прегласување во Гостивар. Оваа одлука на судот, која вечерва ја објави на својата интернет страна, е спротивна на одлуката на Државната изборна комисија која на седница минатата недела донесе заклучок дека гласањето на едно избирачкото место во Гостивар било незаконско.
Имено, приговорот по кој постапуваа членовите на ДИК, беше поднесен од БЕСА и се однесуваше на спорното гласање во избирачкото место 0396/1. Се работи за процесот на гласање на Фатиме Сулејмани, која кога дошла на изборното место сфатила дека некој веќе го искористил нејзиното право на глас. Во ДИК беа повикани на сослушување претседателот и членовите на изборната комисија, како и самата Сулејмани, по што беше донесена одлука да се изврши графолошко вештачење на потписот. Графологот утврди дека нејзиниот потпис бил фалисфикуван.
Одлуката на ДИК да се прифати приговорот на БЕСА, беше донесена со 6 гласа за и 3 против, со што членовите на комисијата донесоа одлука да се поништи гласањето во тоа избирачко место.
Но, Управниот суд ја поништи одлуката на ДИК не навлегувајќи во избирачкиот процес, туку бидејќи приговорот на БЕСА немал потпис од подносителот.
„Поради што Државната Изборна Комисија погрешно го применила материјалното право, постапувајќи по приговорот, без потпис“, пишува во одлуката на Управниот суд објавена попладнево.
Управниот суд прифати по еден приговор на ВМРО-ДПМНЕ и на СДСМ. Тоа значи дека во Гостивар нема да се прегласува, а гласањето ќе се повтори во Теарце. На гласачкото место во Гостивар има запишано 892 гласачи, а во Теарце 714. Разликата меѓу ВМРО-ДПМНЕ и СДСМ во број на мандати е 51 спрема 49, а во број на гласови во шестата изборна единица владејачката коалиција води со само 307 гласа.