Претседателот на Каталонија, Карлес Пучдемонт, ќе ги изгуби сите овластувања и ќе престане да прима плата кога Сенатот ќе го одобри членот 155 од шпанскиот Устав со кој се воведува директна контрола на централната влада над тој регион, рече потпретседателката на шпанската влада Сораја Саенс де Сантамарија.

Сораја Саенс де Сантамарија изјави дека Мадрид би можел привремено да постави претставник кој ќе управува со Каталонија откако Сенатот ќе ја одобри директната власт над таа покраина, пренесува Ројтерс.

Се очекува шпанскиот Сенат во петок да ги усвои мерките кои пред два дена ги предложи шпанската влада за распуштање на каталонската влада и распишување на вонредни избори во наредните шест месеци.

Од друга старана, портпаролот на каталонското министерство за надворешни работи, Раул Ромева, наведе дека Европската Унија ќе го изгуби кредибилитетот ако дозволи Мадрид на Каталонија да и наметне директна власт и истакна дека само каталонскиот народ има право да ги менува регионалните институции.

„Како ЕУ може да живее со таква ситуација доколку се случи“, рече Ромева во изјава за БИ-БИ-СИ радио, одговарајќи на прашањето како каталонската регионална влада ќе ја спречи шпанската влада да наметне директна власт во Барселона.

„Како ЕУ може да биде кредибилна ако дозволи тоа да се случи? Народот и институциите на Каталонија тоа нема да го дозволат“, истакна Ромева.

Претставниците на каталонските партии денеска ќе се состанат за да го договорат датумот и дневниот ред за седницата на регионалниот парламент, на која би имало можност за ново еднострано прогласување на независност.

Шпанската влада во саботата одлучи да започне процес за примена на членот 155 од Уставот, со кој на централната влада ќе и се пренесат овластувањата на каталонската администрација.

За тие мерки, со кои би се суспендирала регионалната влада на Каталонија, во петок на 27. октомври ќе треба да се изјасни и Сенатот, во кој владејачката Народна партија на премиерот Маријано Рахој има мнозинство. Се очекува дека тој ќе ја добија поддршката од опозициските сенатори за мерките насочени за зачувување на единствена Шпанија.