Повеќе од 100 мигранти се исчезнати или се стравува дека се удавени по превртување на брод крај брегот на Либија.
„Бројката на исчезнати се искачи на 115 лица, а 134 се спасени“, изјави Ајуб Касем, портпарол на либиската морнарица.
Агенцијата за бегалци при Обединетите нации (ОН) претходно објави дека 150 лица се водат како исчезнати.
Бродот испловил од Ал Хомс, град на 120 километри источно од Триполи, и во него, според искази на дел од преживеаните, имало околу 250 патници.
Филипо Гранди, висок комесар на ОН за бегалци, ја опиша несреќата како „најголема трагедија во Медитеранот во оваа година“. Притоа го повтори и својот став дека спасените мигранти не треба да се вратат во Либија каде се задржуваат во центри за притвор, но и поради нестабилната политичка ситуација во земјата на африканскиот север.
Либиската крајбрежна стража, пак, вратила најмалку 84 мигранти во центарот за притвор Тајура, според објавата на Твитер на портпаролот на УНХЦР. Објектот во текот на овој месец претрпе воздушен напад пришто загинаа најмалку 50 лица, а 130 беа повредени.
Генералниот секретар на ОН, Антонио Гутереш рече дека е ужаснат од најновата бродска несреќа во Медитеранот.
„Потребни се безбедни и легални рути за мигрантите и за бегалците“, е неговата порака на Твитер.
Во текот на неделата, претставници на УНХЦР и на Интернационалната Организација за Миграција (ИОМ) одржаа средба со европските држави на која разговараа за ситуацијата во Медитеранот и повикаа на превенција за загубите на човечки животи во Либија.
Либија важи за центар за транспорт на мигранти кон Европа, а извештаите на УНХЦР укажуваат дека 34.196 лица ги ризикувале своите животи по потрага по подобро утре во 2019 година.