Полицијата поднесе прекршочни пријави за нарушување на јавен ред и мир против осум лица кои учествуваа во тепачката на 2-ри овој месец во населбата Шуто Оризари, при што беше повреден актуелниот градоначалник и кандидат за уште еден мандат, Елвис Бајрам соопшти денеска на прес-конференција министерот за внатрешни работи Оливер Спасовски.
Против Ш.Д., Ф.Ф., Ј.С., Х.А., Х.М., Х.И., Е.Б. и А.М., СВР Скопје изготви записници за констатиран прекршок против јавниот ред и мир, а целокупниот материјал е доставен до Основното јавно обвинителство – Скопје.
– МВР е одлучно во намерата, а за тоа имаме достатичен капацитет да ги открие и согласно законите да ги процесуира сите вакви настани кои се закануваат да фрлат дамка врз претстојниот изборен процес, истакна Спасовски.
Министерот нагласи дека независно кој од која политичка партија доаѓа, кој чиј симпатизер е, за МВР единствено примарно ќе биде почитувањето на законите што ќе важат за сите подеднакво.
Спасовски апелираше до сите политички партии, како и до граѓаните да ги почитуваат демократските нормативни стандарди за мирни, фер и демократски избори.
Претседателот на Сојузот на Ромите и татко на Елвис Бајрам, Амди, го обвини кандидатот Курто Дудуш дека е нарачател на тепањето, заедно со СДСМ и Неждет Мустафа.
Дудуш денеска повика на смирување на насилството.
Одговарајќи на новинарско прашање за пожарот во куќата на кандидатот за градоначалник на Ѓорче Петров од ВМРО ДПМНЕ Владо Мисајловски, Спасовски рече дека според првични информации, пожарот во куќата на Мисајловски, избувнал поради неправилно изѕидан оџак.