Премиерот Виктор Орбан ги заврши разговорите за формирање нова влада, соопштија денеска од кабинетот на премиерот на Унгарија.

Според најавата, Золт Семен ќе продолжи да ја извршува функцијата вицепремиер, а ќе ја преземе функцијата министер одговорен за унгарските заедници во странство, националните малцинства и верските заедници, јавува МТИ.

Најавено е дека меѓу другото на функцијата министер за земјоделство, односно министер за внатрешни работи остануваат Иштван Наѓ и Шандор Пинтер, а Министерството за одбрана ќе го преземе Кристоф Салај-Бобровнички. Како што беше наведено, на функцијата министер за надворешни работи и трговија ќе остане Петер Сијарто, а секретар на Владата и понатаму ќе биде Антал Роган, додека началник на кабинетот на премиерот Орбан ќе биде Гергељи Гулаш, а Михали Варга ќе продолжи да го води Министерството за финансии.

Кабинетот на унгарскиот премиер соопшти дека Орбан ја структурирал новата влада и ги избрал нејзините министри со цел да ги реши предизвиците со кои моментално се соочува Унгарија, а особено беше нагласено дека војната во Украина ги зголеми цените низ Европа и веројатно ќе предизвика сериозна енергетска криза, наведува МТИ.