Претставници на парламентарните партии денеска се сретнале во Собранието. Ниту еден од присутните пратеници не сакаше да ја коментира причината за средбата, ниту пак да каже за што се разговарало.
Оливер Спасовски од СДСМ за НОВА ТВ рече дека не било координативна средба, но ни потврди дека се сретнале со претседателот на Собранието Талат Џафери.
„Да се сретнавме, но не беше ништо битно и нема што да се коментира“, кусо ни одговори Спасовски.
Инаку вчера претседателот на собранието Талат Џафери најави дека за понеделник ќе закаже координативна средба меѓу претставниците на сите парламентарни партии.
Една од темите на разговор меѓу координаторите на парламентарните групи да биде и датумот за локалните избори. Џафери рече доколку партиите постигнат договор тој веднаш ќе ја започне процедурата за измена на Изборниот Законик.
Мандатот на градоначалниците на општините и на општинските совети истекува во понеделник, а Џафери вчера ги повика политичките партии итно да разговараат за овој проблем, за да не се случи блокада на општините.