Собранието попладнево со мнозинство гласови ја усвои потребата од донесување на измените на Кривичниот законик по скратена постапка, чии предлагачи се неколкумина пратеници од владиното мнозинство.
По ова ќе заседаваат собраниските комисии каде ќе бидат разгледани предлозите.
Координаторот на пратеничката група на ВМРО-ДПМНЕ, Никола Мицевски укажа дека измените три пати се повлекуваат, па се поднесуваат и дека пратениците се збунети и не знаат кои измени се повлечени, а кои се предлагаат.
-Барањето за измени на Кривичниот законик е поднесен па повлечен три пати од вчера до денес. Барам да ни објасните за кои измени треба да гласаме, затоа што пратениците не знаат веќе кој предлог е повлечен, а кој не е, рече Мицевски.
На тоа претседателот на Собранието, Талат Џафери, одговори дека предлагачот има право да повлече предлог според процедурата.
Измените се предложени од пратенците Артан Груби, Снежана Калеска Ванчева, Соња Мираковска, Лидија Тасевска и Весел Мемеди.
Со измените на Кривичниот законик кои се ставени на дневен ред на денешната собраниска седница се предлагаат измени на членот 275-в кој се однесува за злоуптреба на постапката за јавен повик, доделување на договор за јавни набвки или јавно -приватно партнерство. Измените се во ставот 3 во кој се намалува затворската казна од 5 на 4 години. Тој гласи:
„Ако сторителот со извршување на делото од ставот 1 на овој член остварил за себе или за друг имотна корист од поголеми размери, ќе се казни со затвор од најмалку 5 години“.
Сега се менува на „4 години“.
Во предлогот за кој ќе расправа Собранието се повлечени измените на членот 353 од КЗ за злоупoтреба на службената положба и овластување.
Доколку бидат изгласани измените на Кривичниот законик кои се веќе во собраниска процедура, според информации на НОВА, од кривично гонење можат да бидат ослободени обвинетите во случаите „Тендери“ и „Трезор“. Измените на Кривичниот законик можат да влијаат и врз жалбената постапка на веќе обвинетите во „Тенк“.
Во случајот „Тендери“ е обвинета екс министерката за култура Елизабета Канческа Милевска, во „Трезор“ се обвинети Сашо Мијалков Горан Грујовски, Тони Јакимовски и Небојша Стајковиќ. Во „Тенк“ се веќе осудени Никола Груевски, Ѓоко Поповски и Гордана Јанкулоска.
Доколку бидат усвоени денешните измени, тие би имале влијание и врз казната што ја доби Василије Авировиќ, обвинет во случајот „Труст“ на СЈО и син на пратеничката Владанка Авировиќ од СПМ, која гласаше за уставните измени.
Авировиќ беше осуден на три години казна затвор и забрана за вршење дејност и да биде управител или одговорно лице на правно лице во траење од 3 години.
Тој и Сеад Кочан кој беше осуден на 6 години затвор, поднесоа жалби на пресудата до Апелацискиот суд, кој сè уште се нема изјаснето по жалбите на осудените.
Со предложените законски измени, ќе се отвори можност Апелацискиот суд да ја ублажи казната за Авировиќ, односно тој ќе може да добие можност за условна казна.
Министерката за правда Рената Дескоска рече дека од Владата не се доставени измени на Кривичниот законик.