Прекинат е протестот и блокадата на паркингот на Клинички, со ветување од министерот за здравство Венко Филипче дека во тек е постапка да им се врати паркингот во владение. На 24 и 25 декември Синдикатот на вработените на Клинички же има средба со премиерот Зоран Заев на која ќе се разговара за покачувањето на платите на која ќе се инсистиратоа да не биде селективно туку подеднакво за сите вработени, изјави денеска претседателот на Синдикатот Горан Беговиќ.
– Завршен е протестот, министерот Филипче ни рече дека паркингот ќе се врати во владение на Клиничкиот центар, и тој дел е остварен. Но продолжуваме со преговорите за зголемување на платите, што е наш голем проблем, а за што што ќе имаме средба и со премиерот Заев на 24. и 25. декември. Најголемиот револт и незадоволството е што процентите на последното зголемување на платите на вработените се селектирани. Не се сите доктори во Клинички, а ни тие не се задоволни од ветеното зголемување. А и коефициентите за зголемувањето на плати не се со еднаков процент за сите. За сево ова ќе преговараме, а дали зголемувањето на платите ќе биде 15, 10 или 5 отсто, ќе видиме, рече Беговиќ.
Членот на Синдикатот Ивица Апостолов истакна дека вработените во Клинички се незадоволни и треба ресорниот министер Флипче да обезбеди пари за ветеното зголемување на платите.
-Барањето е за сите вработени да биде еднакво зголемувањето, а не селективно, бидејќи со селективно покачување ќе се направи раздор меѓу вработените. Ние сме сите во еден систем и не треба да има поделби меѓу нас, рече Апостолов.
Од Синдикатот на Клинички апелираа протестот да не се злоупотребува политички.
– Апелираме политичките партии да не помислуваат да профитираат од овој наш протест, зашто во Синдикатот има претставници кои се и од ВМРО-ДПМНЕ, од СДСМ и од ДУИ и од другите партии, рече Беговиќ.