Бекир Асани, поранешниот претседател на партискиот огранок на ДУИ во Чаир, по инцидентот кај „Мавровка“ бил повикан во Полициската станица Бит Пазар, по што полицијата изготвила записник за прекршување на јавниот ред и мир, соопшти МВР.

Б.А, како што се води Асани во полицискиот билтен, утрово околу 10 часот на крстосниците на булевар „Гоце Делчев“ и улица „Филип Втори“ во Скопје, близу Мавровка, при подигање на неговото возило од пајак службите нападнал полицајка, по што биле повикани уште неколку полициски службеници.

Во соопштението на МВР се вели дека Б.А најпрво вербално ја нападнал полицајката а бидејќи се однесувал агресивно, на местото на настанот дошле повеќе полицајци.

„Денеска (01.03.) околу 10 часот на крстосниците на булевар “Гоце Делчев” и улица “Филип Втори” во Скопје, при подигање на патничко моторно возило “Ланд ровер” со скопски регистарски ознаки со специјално возило “пајак”, од страна на Б.А. вербално е нападната полициска службеничка, која била на местото на настанот. Бидејќи Б.А. агресивно се однесувал кон полициската службеничка, биле повикани и други полициски службеници на местото на настанот. Со Б.А. е извршен разговор во ПС Бит Пазар и изготвен записник за констатиран прекршок по чл. 13 од Законот за прекршоците против јавниот ред и мир“, се вели во соопштението на МВР.