Златан Ибрахимовиќ го спаси Манчестер јунајтед од пораз на „Олд трафорд“ во 31. премиерлигашко коло. „Црвените ѓаволи“ ремизираа по третпат во последните четири средби, овојпат против Евертн (1:1). Бод сочуваа во 93 минута со удар од белата точка на шведскиот интернационалец. Голот за гостите од „Гудисон парк“ го постигна капитенот Фил Џагиелка во 22 минута.
Составот на Мурињо беше доминантен на теренот по примениот гол. Имаше неколку прилики за израмнување и пред судиското продолжение преку Ибрахимовиќ и Блинд, статива погодија Ерера и Погба, но негативата, сепак, беше анулирана со најстрога казна. И првиот меч во сезоната меѓу Евертон и Манчестер Ј. заврши 1:1 со таа разлика што популарните „карамели“ тогаш израмнија од пенал.
Важна победа забележа Лестер против Сандерленд (2:0). Слимани и Варди реализираа во второто полувреме по асистенции на Марк Олбрајтон за радост на „Кинг Пауер“ стадионот што значат и опстанок во Премиерлигата на, сè уште, актуелниот англиски првак и четвртфиналист во Лигата на шампиони. За „лисиците“ ова е петти триумф во низа за напредок до десеттата позиција на табелата и бегство од опасната зона на безбедни девет бода.
Дербито на 31 коло во Премиерлигата е вечерва (21 ч.) на „Стемфорд бриџ“ каде Челзи е домаќин на Манчестер сити, Арсенал на „Емирати“ го дочекува Вест Хем на Славен Билиќ, Ливерпул пред своите фанови ќе игра со Борнмут, а второпласираниот Тотенхем ќе гостува во Кардиф на екипата на Свонси.
Премиерлига, 31 коло
Резултати
Манчестер јунајтед – Евертон 1:1
Лестер – Сандерленд 2:0
Вотфорд – ВБА 2:0
Барнли – Стоук 1:0
Среда
Арсенал – Вест Хем (20,45 ч.)
Хал – Мидлсборо (20,45 ч.)
Саутемптон – Кристал палас (20,45 ч.)
Свонси – Тотенхем (20,45 ч.)
Челзи – Манчестер сити (21 ч.)
Ливерпул – Борнмут (21 ч.)