Европскиот вицешампион Тотенхем беше непријатно изненаден од Њукасл во третото коло во Премиерлигата. „Црно-белите“ од англискиот североисток славеа во Лондон со 1:0 со голот на 44 милиони „тешкото“ засилување Жоелингтон. Длабочинска топка од Кристијан Атсу и катастрофална реакција на одбраната на „спарси“ му претходно на прецизниот удар на бразилскиот интернационалец за прва победа во сезоната на популарните „страчки“ од „Сент Џејмс парк“.
И покрај засилувањата во летниот период и фактот дека е почеток на сезоната, сепак, киксеви како денешниот, па уште и на домашен терен, се недозволиви за составот на Маурисио Покетино во трката по шампионскиот трофеј со Манчестер сити и со Ливерпул. Таквата мисија ќе биде дополнително отежната и со бледи изданија на Хари Кејн како што беше случај попладнево.
Манчестер сити, пак, без потешкотии го реши Борнмут. Најголеми заслуги за нивниот рутински триумф на стадионот „Виталити“ имаше Серхио Агуеро, стрелец на два гола во 15. минута и во 64. минута, третиот за „граѓаните“ го постигна Рахим Стерлинг во 43. минута. Почесниот за домашните беше дело на Велшанецот Хари Вилсон во последните моменти од првиот дел.
Премиерлига, 3 коло
Тотенхем – Њукасл 0:1
Вулверхемптон – Барнли 1:1
Борнмут – Манчестер сити 1:3
Ливерпул – Арсенал 3:1
Вотфорд – Вест Хем 1:3
Шефилд јунајтед – Лестер 1:2
Манчестер јунајтед – Кристал Палас 1:2
Брајтон – Саутемптон 0:2
Норич – Челзи 2:3
Астон Вила – Евертон 2:0
Табела: Ливерпул 9, Манчестер сити 7, Арсенал 6, Лестер 5, Манчестер јунајтед 4, Барнли 4, Тотенхем 4, Брајтон 4, Шефилд јунајтед 4, Кристал Палас 4, Борнмут 4, Евертон 4, Челзи 4, Весте Хем 4, Вулверхемптон 3, Астон Вила 3, Норич 3, Саутемптон 3, Њукасл 3, Вотфорд 0.