Претседателот на Собранието на Македонија, Талат Џафери, од денеска до 17 ноември ќе престојува во прва официјална посета на Обединетите Арапски Емирати.
Посетата на Џафери се совпаѓа со 25-годишнината од воспоставувањето на дипломатските односи меѓу Македонија и Обединетите Арапски Емирати, каде започнаа и подговките за одбележување на 50-годишнината од основањето на државата.
За време на посетата на Џафери предвидени се средби со домаќинот, Сагар Ал-Гобаш, спикер на Федералниот национален совет и со други високи претставници од Владата на ОАЕ.
Во состав на собраниската делегација, која ја предводи претседателот на Парламентот, се и претседателот на Пратеничката група за соработка на Собранието со парламентите на земјите од Блискиот исток и Арапскиот залив, пратеникот Хусни Исмаили и пратениците Дарко Каевски и Бедри Фазли.
На средбите се очекува да стане збор за унапредување на соработката со Федералниот национален совет на парламентарно ниво, но и севкупните односи меѓу двете држави.
Пратеничката група за соработка на Собранието со парламентите на земјите од Блискиот Исток и Арапскиот Залив е основана во овој пратенички мандат. Предвидено е Џафери и собраниската делегација да го посетат и Павилјонот на Република Северна Македонија на „Експо Дубаи 2020”.