Тенисот би можел да западне во големи проблеми по пензионирањето на Роџер Федерер и на Рафаел Надал. Со ваков став излезе Дејв Мајли, кандидат за претседател на Интернационалната тениска федерација (ИТФ).
Јасно е како ден дека Швајцарецот и Шпанецот нема уште долго да се задржат на АТП турот, а нивното заминување, по така долг период на доминација, може да предизвика негативни ефекти, смета Мајли.
„Мислам дека тенисот како спорт сè уште не е подготвен за такво нешто. Кој ќе работи на промоција и популаризација на тенисот потоа? Кој ќе ги заземе нивните места? Ако бидам избран за претседател на ИТФ, ќе ангажиран луѓе кои ќе смислуваат идеи за промоција на нашиот спорт“, истакна Американецот Мајли во својата кампања.
Федерер и Надал се двајцата најуспешни тенисери по бројот на освоени гренслем титули. Швајцарецот засега е рекордер со 20, Шпанецот има една помалку, а зад нив е Новак Ѓоковиќ со 16.