Во Хрватска денеска се одржуваат претседателски избори на кои 3,85 милиони граѓани со право на глас одлучуваат кој од 11-те кандидати ќе ја предводи државата во наредните пет години. Избирачките места се отворени во 7 часот, а ќе се затворат во 19 часот, додека првите прелиминарни резултати се очекуваат околу 20 часот.
Рекорден број набљудувачи, над 24.000, ја следат работата на изборните тела на претседателските избори. Избирачите во првиот круг од изборите ќе одлучуваат кој ќе влезе во вториот круг, што е извесно дека ќе биде одржан.
Како водечки тројца кандидати во речиси сите анкети се издвојуваат актуелната претседателка Колинда Грабар Китаровиќ, поддржана од владејачката ХДЗ, Зоран Милановиќ, кандидат на СДП и независниот кандидат Мирослав Шкоро.
Хрватската радиотелевизија (ХРТ), според најновата анкета, објави дека во вториот круг ќе влезат актуелната претседателка Грабар Китаровиќ со освоени 28,3 отсто гласови и поранешниот хрватски премиер, социјалдемократот Зоран Милановиќ со поддршка од 26,6 проценти.
Според анкетата, во случај Шкоро да мине во втор круг, би ја победил актуелната шефица на државата со разлика од 3,6 отсто од гласовите (Шкоро 48,7 проценти, а Грабар Китаровиќ 45,1 отсто). Од друга страна, ако во трката би останале Шкоро и Зоран Милановиќ, победничката разлика би била 5,6 отсто во корист на хрватскиот пејач.
Од вкупно 11 кандидати кои ќе учествуваат денеска на изборите, уште само европратеникот и поранешен судија на Стопанскиот суд во Загрем, Мислав Колакушиќ би освоил околу седум отсто, а сите останати се под три проценти.
Претседателот на Хрватска се бира на пет години, а последните претседателски избори се одржаа на 28 декември во 2014 година и вториот круг на 11 јануари во 2015 година, кога актуелната претседателка Колинда Грабар Китаровиќ го победи тогашниот претседател Иво Јосиповиќ.